消費 blog：戶外防曬霜可揀 SPF45

近日天氣熱到攝氏 30幾度，出街行一轉，啲皮膚都曬到赤赤痛，都要買啲防曬霜防身。但家防曬霜指標多多，都唔知點揀。小妹即刻向皮膚科醫生老友求教。佢話，紫外光主要分為長波紫外線 UVA同中波紫外線 UVB，當中 UVA嘅穿透力最強，可以令皮膚曬黑、老化。
點樣解讀防曬霜上面嘅防曬標示呢？老友話，量度 UVA暫時未有國際統一標準，一般日本防曬產品喺用 PA代表，以 PA+++最好；而歐美則以 PPD、 IPD代表，舉例嚟講， PPD2至 4等於 PA+、 PPD4至 8等於 PA++、 PPD>8等於 PA+++。


防蚊防曬霜或會敏感
至於 SPF係防曬系數，例如使用 SPF15防曬霜，即係話一小時出現明顯曬傷的情況，會延長至 15個鐘出現。其實室內嘅活動用 SPF15都好足夠，戶外活動可選擇 SPF45，但 45度以上，防曬效果就相差唔大嘞。老友話，塗防曬霜用量要足，有啲人怕防曬霜太油膩，只塗薄薄一層，係會影響防曬效果。專家指出，每平方厘米應使用唔少於 2mg嘅防曬霜，好似五毫子份量嘅防曬霜，先足夠搽勻臉部。
有啲防曬霜仲話可以防埋蚊，其實唔多好，因為防蚊產品多含有避蚊胺成份，如果使用防曬防蚊二合一產品，容易吸收過多避蚊胺，導致皮膚敏感。